講到露營，第一樣緊係個帳篷啦！係營地，帳篷就好似屋企咁，有一種安全的感覺，亦都係唯一既私人空間，但帳篷又點樣去選擇呢？大多數人無論係新手定老手，可能都係睇外觀同埋幾多人營，就去決定買唔買呢個營，但係其實仲有好多唔同既因素要去考慮架，就等我為大家講解一下啦！

 

1. 帳篷大小

帳篷要跟據唔同既人數而去決定用幾多人營，但個人比較建議人數為 (n+1) 的營會比較合適，即係一人用二人營，二人用三人營，如此類推。(P.S. 因為每個營既大小都唔同，所以要參照實際大小而去決定）
雖然會比帶啱人數既營重，但係空間會比較寬闊，唔洗膊貼膊訓覺，咁就唔驚轉身都會撞醒隔離果個啦。另外，正所謂“防人之心不可無“，小心當你熟睡既時侯，被其他人偷走左貴重嘅裝備，錢並唔係重點，重點係影響成個露營既心情，所以預留位置擺裝備都係不可或缺的。

2. 搭建難易度

搭帳篷都唔係一件容易既事，對於想初嚐露營滋味既朋友更加係一項挑戰，如果搭帳篷既過程太複雜，可能到營地既時侯就要搵人幫幫手啦。哈哈！
帳篷種類多不勝數，對於岩岩開始玩既朋友，速開帳蓬與全自動帳篷都係唔錯既選擇，但如果未來長期都會去露營既話，個人比較推薦入手圓頂型帳篷，簡簡單單又可以體驗搭營既樂趣。
P.S. 在出發前切記要先了解點樣搭你既帳篷，如果屋企夠大，盡可能先係屋企嘗試搭和收帳，到營地就唔會手忙腳亂啦。

3. 價格

正所謂「一分錢一分貨」，材質不同，外形不同，甚至功能不同都會影響帳篷價格，所以買帳篷前要考慮清楚自已可接受既價格範圍。對於剛入坑的朋友，唔需要急住買太貴既營，第一個營主要係比你體驗吓露營既樂趣，如果覺得可以繼續玩落去，先再考慮升級都唔遲，所以大約$300-$500既價格已經有好多唔同既選擇。

4. 耐用與實用性

係戶外露營，日曬雨淋打大風就在所難免，所以防水性、防風、遮光性和透氣性都係挑選帳蓬既重要指標。
防水性一般至少為『1500~2000以上』比較好；
防風則為60 km/h（7級陣風）為佳(P.S. 如果去昂平高原起碼5級陣風，防7級風一D都唔過份)；
遮光性就要睇個人習慣，如果唔想日出就曬到要起身既話，就要買外帳有遮光塗層的（P.S. 但重量會比較重）；
而透氣性則取決於帳篷既設計，例如：帳篷通風口、內外帳的搭設空間等等。

5. 營骨材質

營骨材質主要分為兩種，一個係「玻璃纖維」、另一個係「鋁合金」。
「鋁合金」通常會比較耐用，而「玻璃纖維」用耐左就比較容易脆、斷，係夜晚先黎斷營骨都真係非常麻煩，但鋁合金的缺點在於比較貴。
對於新手既帳篷，多數唔會用很多年，所以買玻璃纖維材質既帳篷都係可以既。當然，如果你想“一步到位“，鋁合金的帳篷就緊係最好的選擇。

6.重量

帳蓬重量好取決於功能性，所以唔可以話重一定唔好，但每個人孭野既能力就有規限，以下就比大家參考一下：

背負重量 = 個人體重 x n%

－ 身體較差、老人家、或者小朋友：建議 = 10%。
－ 身體一般的大人、女性：建議 = 15%。
－ 身體很好的人: 建議 = 20%。
－ 身體特別好的人（如運動員、常年訓練的登山者）：建議 = 30%。

個人強烈建議重量唔好大於個人體重的四分之一，因為可能要上落斜坡或梯級先可以到達露營地點，當體力消耗得七七八八既時侯很容易受傷，所以唔好覺得自己可以，就孭上過重的裝備。

最後，如果睇到呢到既朋友，非常非常多謝你既支持，我地會繼續分享露營既知識比大家，等大家可以對露營有更多認識。

From Landscape.