其實「山野無痕」(Leave no trace)並唔係咩新既terms，只係一直都被大家忽略左，因為大家都覺得"我唔做都唔會有咩影響啦"，但我想講咁諗就大錯特錯！試諗下，當100萬人都有呢個想法，我地既環境又負唔負荷得住呢？記住「多你一個好多」！

就算有聽過「山野無痕」都好，都可能以為做到「自己垃圾，自己帶走」就已經足夠，其實呢樣只係其中一項，要做到”Leave no trace”就要謹記以下既7大法則啦！

1. 事前充分規劃和準備（Plan Ahead and Prepare ）

充分規劃準備可以減少製造垃圾之外，仲可以避免垃圾遺留係山上既機會，例如：我地可以用可循環再用既水袋，減少買用完即棄既樽裝水。出發前盡可能將食物既包裝提前拆除，將食物放入可循環再用既保鮮盒裏面等。唔帶會丟棄既垃圾上山，咁咪可以減少唔小心留低垃圾既機會囉！

2. 在正規位置行走及露營（Travel and Camp on Durable Surfaces）

簡單黎講，就是有大路請行大路，無大路都唔好亂咁開路。而露營都一樣，唔好自己亂咁爆林去開發一個新既營地呀。

3. 妥善處理垃圾（Dispose of Waste Properly）

正如開場所講，「自己垃圾，自己帶走」，在山上即使見到有垃圾桶，都盡可能將垃圾帶落山，因為要隔好耐先會有清潔工友清潔，仲要逐袋垃圾搬落山，將心比心，都係乖乖地帶埋落山啦！

P.S. 好多人以為生果皮同核等廚餘可以自然分解，但其實要好長既時間先可以分解到，仲有機會吸引到小動物，所以都係唔好隨地丟啦。

4. 保持原有風貌（Leave What You Find）

正所謂「眼看手勿動」。就算見到啲好靚既石頭或者貝殼之類都好，都唔好拎走佢地，一黎唔會破壞生態，二黎其他人都可以一齊欣賞到呢個咁靚既風景，何樂而不為呢？同埋而家既手機相機鏡頭咁靚，其實影張相留念已經足夠。

5. 減低用火對環境的衝擊（Minimize Campfire Impacts）

係生火前，先留意果個地方可唔可以生火，亦都盡可能用爐具生火煮食。如果想玩柴火炭火，記得用焚火台同埋墊番個防火墊，因為燒地既影響比想象中大好多架，千祈唔好燒地呀！另外，走之前都要確保火種完全熄滅，避免引發山火。

6. 尊重野生動植物（Respect Wildlife）

係郊外，我地只不過係一個遊客，但對於野生動物黎講，個到先係佢地屋企，所以盡可能同佢地保持距離唔好打擾佢地。
另外，記得千其唔好餵飼野生動物，提前了解營地會唔會有牛或是野豬，如果有的話，食物就要妥善收好，遇到搶食都可以即時拎走，唔係既話就會比佢地搶哂架啦！訓教既時間垃圾都要盡量掛起，避免野生動物咬開膠袋食垃圾同淨低既食物。

7. 顧及其他使用者（Be Considerate of Other Visitors）

大家去露營可能係有唔同既目的，有啲人去露營係想一大班朋友一齊玩，有啲營友就想靜靜咁享受郊外既景色，所以一大班營友係玩既同時都要顧及其他人既感受，盡可能將聲浪收細，同埋唔好用喇叭大聲聽歌，11點後就唔好大聲喧嘩，好多營友其實好早就會入營休息。

最後，希望大家在走之前，要檢查清楚自己冇留低垃圾之外，都希望每人都可以行多一步，盡能力執走眼見既垃圾，為保護大自然出一分力。

From Landscape.